પાલાવાસણા બ્રિજ પાસેથી દસ લાખથી વધુના વિદેશી દારૂ સાથે ૨૦.૪૮ લાખનો મુદ્દામાલ જપ્ત: સ્થાનિક ગુના શોધક શાખાએ રાજસ્થાનના બે તસ્કરોને ઝડપ્યા
ગરવી તાકાત ઃ 3-10-2026
લક્ઝુરિયસ ગાડીમાં છુપાવીને લઈ જવાતી વિવિધ બ્રાન્ડની ૨૫૮૮ બોટલો પકડાઈ, બ્રિટનના નંબરવાળા સૂત્રધાર રાજુ સામે ગુનો નોંધી તાલુકા પોલીસે વધુ તપાસ હાથ ધરી
મહેસાણા જિલ્લામાં દારૂબંધી અને ગેરકાયદેસર પ્રવૃત્તિઓ સામે ચાલી રહેલી કડક ઝુંબેશ વચ્ચે સ્થાનિક ગુના શોધક શાખા (એલસીબી)ની ટીમને મોટી સફળતા હાથ લાગી છે. પાલાવાસણા બ્રિજના છેડે સફળ નાકાબંધી ગોઠવીને લક્ઝુરિયસ મોટરકારમાંથી દસ લાખ અઢાર હજાર રૂપિયાથી વધુની કિંમતનો ભારતીય બનાવટનો વિદેશી દારૂ ઝડપી પાડવામાં આવ્યો છે. પોલીસે મોંઘીદાટ ગાડી અને મોબાઈલ ફોન સહિત કુલ વીસ લાખ અડતાલીસ હજાર રૂપિયાથી વધુનો મુદ્દામાલ કબજે કરી રાજસ્થાનના બે પરપ્રાંતીય શખ્સોને રંગેહાથ ઝડપી લીધા છે.
ગાંધીનગર રેન્જ નાયબ પોલીસ મહાનિરીક્ષક વિરેન્દ્રસિંહ યાદવ તથા મહેસાણા જિલ્લા પોલીસ અધિક્ષક હિમાંશુ સોલંકીની કડક સૂચનાઓના પગલે જિલ્લામાં પ્રોહિબિશન અને જુગારની બદીઓ નાબૂદ કરવા માટે વિશેષ પેટ્રોલિંગનું આયોજન કરવામાં આવ્યું હતું. આ ઝુંબેશ અંતર્ગત સ્થાનિક ગુના શોધક શાખાના પોલીસ નિરીક્ષક એ.એમ. કામળીયાની ટીમના જવાનો પેટ્રોલિંગમાં હતા, તે દરમિયાન પોલીસ નિરીક્ષકને અંગત બાતમીદારો પાસેથી ચોક્કસ બાતમી મળી હતી કે પાલનપુર તરફથી અમદાવાદ તરફ એક સફેદ રંગની લક્ઝુરિયસ કિયા સેલ્ટોસ ગાડી વિદેશી દારૂનો મોટો જથ્થો ભરીને પસાર થવાની છે.
ચોક્કસ બાતમીના આધારે પોલીસ ઉપનિરીક્ષક બી.વી. વાઘેલા તથા એલસીબી સ્ટાફના જવાનોએ કોઈપણ ક્ષતિ વગર પાલાવાસણા બ્રિજના છેડે કડક વોચ ગોઠવી દીધી હતી. બાતમી મુજબની સફેદ કલરની ગાડી ત્યાંથી પસાર થતાં જ પોલીસે વ્યૂહાત્મક રીતે ઘેરાબંધી કરીને ગાડીને આંતરી લીધી હતી. ત્યારબાદ કારની ઝીણવટભરી તલાશી લેવામાં આવતા તેમાંથી અલગ-અલગ જાણીતી બ્રાન્ડની વિદેશી દારૂની સીલબંધ ૨૫૮૮ નંગ બોટલો મળી આવી હતી, જેનું કુલ પ્રમાણ ૫૩૪.૨૪ લીટર જેટલું થતું હતું.
પોલીસે ઘટનાસ્થળેથી દસ લાખ અઢાર હજાર ત્રણસો આઠ રૂપિયાની કિંમતનો વિદેશી દારૂ, દસ લાખ રૂપિયાની અંદાજિત કિંમત ધરાવતી કિયા સેલ્ટોસ ગાડી તેમજ ત્રીસ હજાર રૂપિયાની કિંમતના બે નંગ મોબાઈલ ફોન મળીને કુલ વીસ લાખ અડતાલીસ હજાર ત્રણસો આઠ રૂપિયાનો મુદ્દામાલ કાયદેસર રીતે જપ્ત કર્યો હતો. ગાડીમાં સવાર રાજસ્થાનના બાલોતરા જિલ્લાના બાઇતુ તાલુકાના બોડવા ગામના ૨૩ વર્ષીય નારણારામ ખુમારામ સુતરારામ ગોદારા (જાટ) તેમજ બાલોતરા જિલ્લાના ગૂડામાલાની તાલુકાના નવી ખડાલી ગામના ૨૦ વર્ષીય રમેશ શંકરારામ માનારામ બાંગડવા (બિશ્નોઇ) નામના બે યુવકોની અટકાયત કરવામાં આવી હતી.
પ્રાથમિક તપાસમાં આ દારૂનો જથ્થો મંગાવવામાં બ્રિટનના વિદેશી મોબાઈલ નંબરવાળા રાજુ નામના શખ્સની સંડોવણી હોવાનું ખુલતા તેને વોન્ટેડ જાહેર કરવામાં આવ્યો છે. આ સમગ્ર મામલે મહેસાણા તાલુકા પોલીસ મથકમાં પ્રોહિબિશન ધારા હેઠળ કાયદેસરનો ગુનો નોંધી આગળની કડક કાનૂની કાર્યવાહી શરૂ કરવામાં આવી છે. આ સફળ ઓપરેશન પાર પાડવામાં એલસીબી પોલીસ નિરીક્ષક એ.એમ. કામળીયા, પોલીસ ઉપનિરીક્ષક બી.વી. વાઘેલા સહિત મુખ્ય કોન્સ્ટેબલ મહેન્દ્રકુમાર, કોન્સ્ટેબલ કલ્પેશકુમાર, મેહુલજી, આશિકકુમાર અને ધવલજીએ સરાહનીય ભૂમિકા ભજવી હતી.
