ગરવી તાકાત ઃ 15-9-2026
મહેસાણા મહાનગરપાલિકા દ્વારા શહેરમાં રખડતા કૂતરાઓની વધતી વસ્તીને અંકુશમાં લેવા માટે હાથ ધરવામાં આવેલા શ્વાન ખસીકરણ પ્રોજેક્ટ સામે ગંભીર સવાલો અને શંકાના વાદળો ઘેરાયાં છે. આ સમગ્ર અભિયાનમાં કરોડો રૂપિયાનો આંધણ કરીને વ્યાપક સ્તરે ભ્રષ્ટાચાર આચરવામાં આવ્યો હોવાનો અત્યંત ચોંકાવનારો આક્ષેપ કોંગ્રેસ પક્ષ તરફથી કરવામાં આવતાં સ્થાનિક રાજકારણમાં ભારે ગરમાવો આવી ગયો છે. કોંગ્રેસ પક્ષના નેતા ભૌતિક વી. ભટ્ટે આ મામલે મ્યુનિસિપલ કમિશનર તેમજ મેયરને ઉદ્દેશીને એક કડક શબ્દોમાં લેખિત પત્ર પાઠવ્યો છે અને પાલિકા તંત્ર દ્વારા આચરેલી ગેરરીતિઓની પોલ છતી કરી છે.
ભૌતિક ભટ્ટે પોતાના પત્રમાં સીધો આરોપ લગાવ્યો છે કે શ્વાન ખસીકરણની કામગીરી માટે કોઈ પણ પ્રકારની સત્તાવાર વહીવટી પ્રક્રિયાનું પાલન કરવામાં આવ્યું નથી. સામાન્ય રીતે કોઈ પણ સરકારી કે સ્થાનિક સ્વરાજ્યની સંસ્થામાં આવા પ્રોજેક્ટ માટે જાહેરાત બહાર પાડવી, સક્ષમ સમિતિની રચના કરવી, નિયમાનુસાર ઇન્ટરવ્યુ યોજવા કે સામાન્ય સભામાં મંજૂરી મેળવતો ઠરાવ કરવો અનિવાર્ય હોય છે. જોકે આ પ્રોજેક્ટમાં તમામ નિયમો અને કાયદાઓને નેવે મૂકીને માત્ર મળતિયાઓને લાભ પહોંચાડવા સગાવાદ ચલાવી બારોબાર તબીબોની નિમણૂક કરી દેવામાં આવી છે. આ ગોલમાલ પાછળ મોટો આર્થિક વ્યવહાર થયો હોવાની પ્રબળ આશંકા તેમણે વ્યક્ત કરી છે.
પત્રમાં આગળ જણાવ્યા અનુસાર, શ્વાનોના ઓપરેશન કોઈ લાયકાત ધરાવતા નિષ્ણાત સર્જન કે પશુચિકિત્સક દ્વારા કરવાને બદલે તદ્દન બિનઅનુભવી કે સામાન્ય વ્યક્તિઓ પાસે કરાવવામાં આવી રહ્યા છે. આ અણઘડ અને અમાનવીય પદ્ધતિને કારણે ઓપરેશન બાદ શ્વાનોમાં ગંભીર ચેપ ફેલાઈ રહ્યો છે, જેના પરિણામે શરીરમાં પાક અને અસહ્ય સોજા થઈ જવાના કારણે અત્યાર સુધીમાં અંદાજે ૩૦ ટકા જેટલા નિર્દોષ શ્વાનો કણસી કણસીને મોતને ભેટ્યા હોવાનો ગંભીર દાવો કરવામાં આવ્યો છે.
આ ઉપરાંત સમગ્ર પ્રોજેક્ટમાં તંત્રની પારદર્શિતા સામે મોટા સવાલો ખડા કરતાં તેમણે જણાવ્યું છે કે ખસીકરણ પાછળ લાખો-કરોડો રૂપિયાની ચૂકવણી થઈ ગઈ હોવા છતાં રેકોર્ડ પર ડોક્ટરોની સહીવાળા કોઈ ચોક્કસ લેખિત પુરાવા કે સત્તાવાર આંકડા જ ઉપલબ્ધ નથી. બીજી બાજુ શહેરમાં શ્વાનોની વસ્તી કે તેમના સંવર્ધનમાં કોઈ જ ઘટાડો જોવા મળતો નથી, જેના પરથી સ્પષ્ટ સાબિત થાય છે કે મોટાભાગની કામગીરી માત્ર કાગળ પર દર્શાવીને જનતાના પરસેવાના નાણાં ઓળવી જવાનું એક વ્યવસ્થિત ષડયંત્ર રચાયું છે.
પાલિકાના આ કથિત ભ્રષ્ટાચાર, બેદરકારી અને મૂંગા પશુઓ પ્રત્યેની ક્રૂરતા સામે કોંગ્રેસે હવે આરપારની લડાઈ લડવાનો નિર્ણય કર્યો છે. પ્રજાના નાણાંની ખુલ્લેઆમ લૂંટ અને તંત્રની નિષ્ક્રિયતાના વિરોધમાં આગામી ૧૬ સપ્ટેમ્બર ૨૦૨૬થી ઉગ્ર આંદોલન છેડવાની ચીમકી ઉચ્ચારવામાં આવી છે. આ આંદોલન સંગ્રામના પ્રારંભિક પગલા તરીકે મહેસાણા મ્યુનિસિપલ કોર્પોરેશનના મુખ્ય પ્રવેશદ્વારે ભ્રષ્ટાચારના શ્વાન ખસીકરણનું પ્રથમ પ્રતીકાત્મક તોરણ બાંધીને શાસકો તેમજ અધિકારીઓ સામે વિરોધ પ્રદર્શન કરવામાં આવશે. આ મામલે ઉચ્ચ કક્ષાએથી તટસ્થ તપાસ કરાવી કસૂરવારો સામે કડક ફોજદારી પગલાં ભરવામાં આવે તેવી પણ લોકલાગણી પ્રવર્તી રહી છે.
