ઊંઝાના ઉનાવામાં રિયા એસ્ટેટ પાછળ ગોડાઉન પર તંત્રનો સપાટો: ૨૫૦૦ જેટલી સરકારી યુરિયા ખાતરની બેગનો ગેરકાયદે જથ્થો ઝડપાયો
મામલતદાર, ખેતીવાડી અને એલસીબીની સંયુક્ત રેડમાં કૌભાંડ ઝડપાયું; સરકારી ખાતરને ખાનગી કટ્ટામાં પેક કરવાનું ષડયંત્ર હોવાની આશંકા વચ્ચે કડક ફોજદારી કાર્યવાહી હાથ ધરાઈ
ઊંઝા / મહેસાણા:
મહેસાણા જિલ્લાના ઊંઝા પંથકમાં ખેડૂતો માટે અપાતા સરકારી સબસિડીયુક્ત યુરિયા ખાતરના ગેરકાયદે સંગ્રહ અને કાળાબજારનું એક મોટું રેકેટ ઝડપાયું છે. ઉનાવા ગામ નજીક આવેલા રિયા એસ્ટેટની પાછળ સ્થિત એક ગોડાઉન પર મહેસૂલ તંત્ર, સ્થાનિક પોલીસ અને ખેતીવાડી વિભાગની સંયુક્ત ટીમે ઓચિંતો દરોડો પાડી અંદાજે ૨૫૦૦ જેટલી નીમ કોટેડ યુરિયા ખાતરની થેલીઓનો માતબર જથ્થો ઝડપી લેતાં સમગ્ર પંથકના ખાતર માફિયાઓ અને કાળાબજારીયા તત્વોમાં ભારે ફફડાટ વ્યાપી ગયો છે. ખેડૂતોને રાહત દરે મળતા સરકારી ખાતરને ખાનગી કંપનીના નામે બજારમાં ઊંચા ભાવે વેચી મારવાના મોટા કાવતરાનો આ ઓપરેશન દરમિયાન પર્દાફાશ થયો છે.
મળતી ચોક્કસ વિગતો મુજબ, ઉનાવાના રિયા એસ્ટેટ પાછળ આવેલા ગણેશ એગ્રો નામના ગોડાઉનમાં સરકારી સબસિડી ધરાવતું નીમ કોટેડ યુરિયા ખાતર ગેરકાયદેસર રીતે સંગ્રહાયું હોવાની ગુપ્ત અને સચોટ બાતમી ઊંઝા મામલતદાર દીપક ગઢવી, મહેસાણા લોકલ ક્રાઇમ બ્રાન્ચ (એલસીબી) તેમજ જિલ્લા ખેતીવાડી વિભાગની ટીમને મળી હતી. આ સંયુક્ત ટીમે પૂરી પૂર્વતૈયારી સાથે ગોડાઉન પર છાપો મારતાં સ્થળ પર સબસિડીવાળા ખાતરની બોરીઓનો વિશાળ ખડકલો જોઈ ખુદ અધિકારીઓ પણ ચોંકી ઉઠ્યા હતા. સ્થળ તપાસમાં આ ગોડાઉન મૂળ શશિકલાબેન પટેલની માલિકીનું હોવાનું અને તેમણે તે ‘ગણેશ એગ્રો સેન્ટર’ના સંચાલક વિવેકભાઈ નામના શખ્સને ભાડે આપેલું હોવાની વિગતો સપાટી પર આવી છે.
તંત્ર દ્વારા કરવામાં આવેલી ઝીણવટભરી તપાસ દરમિયાન ગોડાઉનમાંથી માત્ર સરકારી યુરિયા જ નહીં, પરંતુ ખાનગી ખાતર ઉત્પાદક કંપનીઓના ખાલી કટ્ટા, બોરીઓ સીવવા માટેના આધુનિક સાધનો, સોય અને દોરા સહિતનો મુદ્દામાલ પણ હાથ લાગ્યો છે. સ્થળ પરથી મળી આવેલી આ સંદિગ્ધ સામગ્રી પરથી એવી પ્રબળ આશંકા વ્યક્ત કરવામાં આવી રહી છે કે સરકાર દ્વારા ખેડૂતોના ઉત્કર્ષ માટે રાહત દરે અપાતા સબસિડીયુક્ત યુરિયા ખાતરને ખાનગી બોરીઓમાં પલટી કરી, પેકિંગ બદલીને ખુલ્લા બજારમાં ઊંચા દામે વેચવાનું કે ઔદ્યોગિક એકમોમાં સગેવગે કરવાનું સુવ્યવસ્થિત ષડયંત્ર ચાલતું હતું.
આ મામલે ખેતીવાડી વિભાગ દ્વારા સ્થળ પર પકડાયેલા શંકાસ્પદ ખાતરના કાયદેસર સેમ્પલ મેળવી તેને તાકીદે સરકારી લેબોરેટરીમાં ચકાસણી અર્થે મોકલવાની કાર્યવાહી પૂર્ણ કરવામાં આવી છે તેમજ સમગ્ર ૨૫૦૦ બેગના જથ્થાને સીઝ કરવામાં આવ્યો છે. મામલતદાર તેમજ પોલીસ વિભાગના અધિકારીઓએ આ મામલે સ્પષ્ટ જણાવ્યું છે કે સરકારી નિયમોનું સરેઆમ ઉલ્લંઘન કરી બિનઅધિકૃત રીતે ખાતરનો જથ્થો સંગ્રહવા અને તેના ગેરકાયદે વેચાણ સાથે સંકળાયેલા તમામ મુખ્ય સૂત્રધારો સામે કડક કાયદાકીય કલમો હેઠળ ગુનો નોંધી ફોજદારી કાર્યવાહી હાથ ધરવામાં આવી રહી છે. ખેડૂતોના હકનું ખાતર ચાંઉ કરી જતાં તત્વો સામે તંત્રની આ આકરી તવાઈથી સમગ્ર મહેસાણા જિલ્લામાં ચકચાર મચી જવા પામી છે.
