મહેસાણામાં ‘સ્વચ્છ દિવાળી, શુભ દિવાળી’ ઝુંબેશ અંતર્ગત ઉત્કૃષ્ટ કામગીરી બદલ પાંચ મહિલા સફાઈ કામદારોને મેયર સોનલબેન ઓઝાના હસ્તે એવોર્ડ અને રૂ. ૧૦-૧૦ હજારનો ચેક અર્પણ કરાયો
ગરવી તાકાત
દિવાળીના પર્વ દરમિયાન શહેરના ઘર, દુકાનો અને રસ્તાઓ રંગબેરંગી રોશનીથી ઝળહળી ઊઠતા હોય છે, પરંતુ આ ભવ્ય ચમક અને સુંદરતા પાછળ સફાઈ કામદારોની દિવસ-રાતની અથાક મહેનત અને નિષ્ઠા છુપાયેલી હોય છે. શહેરને સાફ-સુથરું, સ્વચ્છ અને સુંદર રાખવાની આ ઉત્તરદાયિત્વ ભરેલી જવાબદારીને અત્યંત નિષ્ઠાપૂર્વક નિભાવતી મહેસાણાની પાંચ મહિલા સફાઈ કામદારોની સરાહનીય કામગીરીને મહેસાણા મહાનગરપાલિકા દ્વારા વિશેષ રૂપે બિરદાવવામાં આવી છે.
સ્વચ્છ ભારત મિશન (શહેરી) ગુજરાત અંતર્ગત રાજ્યભરમાં યોજાયેલી ‘સ્વચ્છ દિવાળી, શુભ દિવાળી’ ઝુંબેશના ભાગરૂપે મહેસાણામાં એક સન્માન સમારોહનું આયોજન કરવામાં આવ્યું હતું, જેમાં વર્ષ દરમિયાન પોતાની ફરજ અદા કરનાર પાંચ તેજસ્વી મહિલાઓને ‘શ્રેષ્ઠ સફાઈ કર્મચારી એવોર્ડ’થી સન્માનિત કરવામાં આવી હતી. મહાનગરપાલિકાના મેયર સોનલબેન વિષ્ણુભાઈ ઓઝાના પવિત્ર હસ્તે આ તમામ મહિલા કર્મચારીઓને સન્માનપત્ર, વિશિષ્ટ એવોર્ડ તેમજ પ્રોત્સાહનરૂપે રૂ. ૧૦,૦০০ (દસ હજાર રૂપિયા) નો ચેક અર્પણ કરવામાં આવ્યો હતો.
આ પ્રસંગે ઉપસ્થિત મેયરે પોતાના સંબોધનમાં જણાવ્યું હતું કે શહેરને સ્વચ્છ, સુંદર અને સ્વસ્થ રાખવામાં સફાઈ કામદારોનું યોગદાન અત્યંત મહત્ત્વનું અને અનિવાર્ય છે. આ મહિલાઓની ઉત્કૃષ્ટ અને સમર્પિત કામગીરીને બિરદાવવાની સાથે સાથે અન્ય કર્મચારીઓમાં પણ સવાયા ઉત્સાહની પ્રેરણા જાગે તેવા મુખ્ય હેતુથી આ સન્માન કાર્યક્રમનું આયોજન કરવામાં આવ્યું હતું. તેમણે તમામ સફાઈ કામદારોની નિસ્વાર્થ સેવાઓની મુક્તકંઠે પ્રશંસા કરી હતી.
આ વિશેષ સન્માન માટે મહિનાવાર ઉત્કૃષ્ટ પ્રદર્શનના આધારે પાંચ મહિલાઓની પસંદગી કરવામાં આવી હતી, જેમાં એપ્રિલ મહિના માટે સ્ટેશન વોર્ડનાં હિનાબેન મકવાણા, મે મહિના માટે નાગલપુર વોર્ડનાં કમુબેન મકવાણા, જૂન મહિના માટે ગોપીનાળા વોર્ડનાં વનિતાબેન ભૂતડીયા, જુલાઈ મહિના માટે રાધનપુર વોર્ડનાં હંસાબેન મકવાણા અને ઓગસ્ટ મહિના માટે પરા વોર્ડનાં રેખાબેન વાઘેલાની પસંદગી કરવામાં આવી હતી. આ મહિલાઓની સન્માનજનક ઉપલબ્ધિથી સમગ્ર નગરપાલિકા પરિવાર અને સફાઈ કર્મચારીઓમાં આનંદની લાગણી પ્રસરી ગઈ છે.
