વરસાદ બાદ રાજ્યના અનેક રસ્તાઓની હાલત ખરાબ, રોડમાં પડેલા ખાડાથી જનતા પરેશાન

ઉત્તર ગુજરાતના અનેક જિલ્લાઓના રોડ રસ્તાઓની પણ ખખડધજ હાલત છે. જેમાં મહેસાણા, પાટણ, બનાસકાંઠા સહિત સાબરકાંઠાના રોડ રસ્તાઓની બિસ્માર હાલત

ગરવી તાકાત, મહેસાણા તા. 07 – ગુજરાતીઓને વરસાદમાં મુશ્કેલી, વરસાદ પછી પણ મુશ્કેલી…પહેલા રોડ પર પાણી હતા અને હવે રોડ પર ખાડા છે…એવા ખાડા કે જે વાહનચાલકોને દિવસે ડાન્સ કરાવે છે અને રાત્રે અકસ્માતને નોંતરે છે…રાજ્યનું પાટનગર હોય કે પછી આર્થિક પાટનગર…રોડ પર ખાડા જ ખાડા છે. ઉત્તર ગુજરાતના અનેક જિલ્લાઓના રોડ રસ્તાઓની પણ ખખડધજ હાલત છે. જેમાં મહેસાણા, પાટણ, બનાસકાંઠા સહિત સાબરકાંઠાના રોડ રસ્તાઓની બિસ્માર હાલત છે જેને પગલે વાહનચાલકો ભારે હાલાકી ભોગવી રહ્યા છે.

ધોળા દિવસે ડિસ્કો કરવો હોય અને મફતમાં રાઈડની મજા માણવી હોય તો દેશવાસીઓ તમારે પાટનગર ગાંધીનગર આવવું પડશે…હાં ખાડાનગર ગાંધીનગરમાં…અહીં વાહનચાલકોના મણકાં તુટવાની અને કમર ભાંગવાની ગેરંટી છે…સાથે જ હાડકાં તો ભાંગીને ભૂકો થઈ જશે…કારણ કે રાજ્યની રાજધાની ગાંધીનગર ખાડાનગર બની ગયું છે…જ્યાંથી રાજ્યનું સંચાલન થાય છે ત્યાં જ જો આવી સ્થિતિ હોય તો પછી અન્ય શહેરો કે ગામની તો વાત જ ન કરી શકાયને ?.

મહેસાણામાં શહેરના આંતરિક રસ્તાઓ સામાન્ય વરસાદમાં જ એટલા બિસ્માર થઈ ગયા છે કે અકસ્માતને આમંત્રણ આપી રહ્યા છે. નવા નક્કોર વાહનોને ભંગાર બનાવી રહ્યા છે. અને ટુ વ્હીલર ચાલકોની કેડ ભાંગી રહ્યા છે…રોડ પર મસમોટા ખાડા છે, તમામ રોડ ઉબડખાબડ થઈ ગયા છે. પણ અધિકારી હોય કે પદ્દાધિકારી તેમને આ ખાડા નજરે નથી પડતાં…કોઈએ આ ખાડાને પુરવાની હજુ સુધી તો દરકાર નથી લીધી…જેના કારણે વાહનચાલકો ત્રાહિમામ થઈ ગયા છે.