શેરી ગરબાઓએ લીધું પાર્ટી પ્લોટ જેવું વિશાળ સ્વરૂપ: ખેલૈયાઓ માટે પાસ વિના મુક્ત પ્રવેશ અને મહિલાઓની સુરક્ષા પર વિશેષ ભાર
ગરવી તાકાત ઃ 11-10-2026
જિલ્લામાં ૮૦૦થી વધુ પોલીસ અધિકારી-જવાનોનો લોખંડી બંદોબસ્ત ગોઠવાયો, સમર્પણ ગ્રુપ દ્વારા ૨ થી ૩ હજાર મહિલાઓ રમી શકે તેવું ભવ્ય આયોજન અને દીકરીઓ માટે વિનામૂલ્યે ડ્રોપ વાહનની સુવિધા ઉપલબ્ધ
મા જગદંબાની ભક્તિ અને આરાધનાના મહાપર્વ નવરાત્રિ મહોત્સવનો શુભારંભ થઈ રહ્યો છે ત્યારે સમગ્ર મહેસાણા પંથકમાં અનેરો ઉત્સાહ અને ભક્તિમય માહોલ છવાઈ ગયો છે. ગરબે ઘૂમવા માટે ખેલૈયાઓ અધીરા બન્યા છે, તો બીજી તરફ આયોજકો અને જિલ્લા પોલીસ વહીવટી તંત્ર પણ તમામ વ્યવસ્થાઓ સાથે સજ્જ થઈ ચૂક્યા છે. મહેસાણા શહેરમાં બદલાતા સમય સાથે ગરબા મહોત્સવના સ્વરૂપમાં પણ મોટો બદલાવ જોવા મળી રહ્યો છે. વર્ષો જૂની પરંપરા મુજબ ચોક કે પોળમાં રમાતા શેરી ગરબાઓએ હવે આધુનિકતા અપનાવીને વિશાળ પાર્ટી પ્લોટ જેવો ભવ્ય ઓપ ધારણ કર્યો છે. આ મોટા પાયે યોજાતા ગરબા મહોત્સવોની સૌથી મોટી વિશેષતા એ છે કે તેમાં ખેલૈયાઓ માટે કોઈ પણ પ્રકારની એન્ટ્રી ફી કે પાસ સિસ્ટમ રાખવામાં આવતી નથી, જેથી સામાન્ય પરિવારોના ખેલૈયાઓ પણ કોઈપણ જાતના આર્થિક બોજ વિના મુક્ત મને માતાજીની આરાધના કરી શકે છે. સમગ્ર પરિસરમાં મહિલાઓ અને દીકરીઓની સલામતીને સર્વોચ્ચ પ્રાથમિકતા આપીને ચારેતરફ ત્રીજી આંખ સમાન સીસીટીવી કેમેરા ગોઠવી દેવાયા છે તેમજ પાયાની તમામ સવલતો ઉપલબ્ધ કરાવાઈ છે.
સમગ્ર જિલ્લામાં નવરાત્રિ મહોત્સવ સંપૂર્ણ શાંતિપૂર્ણ, સુરક્ષિત અને હર્ષોલ્લાસભર્યા વાતાવરણમાં સંપન્ન થાય તે હેતુથી મહેસાણા જિલ્લા પોલીસ તંત્ર દ્વારા અભેદ્ય સુરક્ષા કવચ ગોઠવી દેવામાં આવ્યું છે. શહેર તેમજ ગ્રામ્ય વિસ્તારોમાં આવેલા તમામ નાના-મોટા નવરાત્રિ મેદાનો, પાર્ટી પ્લોટ્સ અને શેરી ગરબાઓના સ્થળોએ ચુસ્ત પોલીસ પહેરો તૈનાત રહેશે. જિલ્લા પોલીસ વડાના સીધા માર્ગદર્શન હેઠળ ૩ નાયબ પોલીસ અધિક્ષક (ડીવાયએસપી), ૨૧ પોલીસ ઈન્સ્પેક્ટર, ૩૯ પોલીસ સબ ઈન્સ્પેક્ટર તેમજ ૭૬૦થી વધુ પોલીસકર્મીઓ અને હોમગાર્ડ-ટીઆરબીના જવાનો સમગ્ર નવરાત્રિ દરમિયાન રાઉન્ડ ધ ક્લોક ખડેપગે ફરજ બજાવશે. આ ઉપરાંત અસામાજિક તત્વો અને રોમિયોગીરી કરનારાઓ પર વોચ રાખવા માટે સાદા ડ્રેસમાં મહિલા અને પુરુષ પોલીસ કર્મચારીઓની શી-ટીમ પણ સતત પેટ્રોલિંગ કરતી જોવા મળશે.
શહેરના જાણીતા ‘સમર્પણ ગ્રુપ ઓફ મહેસાણા’ દ્વારા કરવામાં આવેલા વિશિષ્ટ આયોજન અંગે માહિતી આપતાં મુખ્ય આયોજક દેવેશ પટેલે જણાવ્યું હતું કે, સમર્પણ ગ્રુપ માટે આ વર્ષ અત્યંત ગૌરવપૂર્ણ છે કારણ કે સંસ્થા પોતાના નવરાત્રિ મહોત્સવનું ૨૬મું રજત જયંતી વર્ષ પૂર્ણ કરી આગળ વધી રહી છે. આ નિમિત્તે ખેલૈયાઓ માટે ભવ્ય અને સુરક્ષિત વાતાવરણ તૈયાર કરવામાં આવ્યું છે. ગરબા રમવા આવતી મહિલાઓ અને દીકરીઓને કોઈપણ પ્રકારની અસુવિધા ન થાય તે માટે સમગ્ર ગ્રાઉન્ડમાં અત્યાધુનિક સીસીટીવી નેટવર્ક, ફાયર સ્ટેશનની બાજુમાં અલાયદા ટોયલેટ બ્લોક્સ તેમજ શુદ્ધ પીવાના પાણીની સુવિધા ઊભી કરવામાં આવી છે. આ ગ્રાઉન્ડમાં એકસાથે બેથી ત્રણ હજાર મહિલાઓ મન મૂકીને ગરબે ઘૂમી શકે તેટલી વિશાળ જગ્યા, નયનરમ્ય રોશની, ઉત્કૃષ્ટ સાઉન્ડ સિસ્ટમ અને પાર્કિંગ સહિત સરળ આવાગમન માટે સુવિધાજનક રસ્તાઓ તૈયાર કરાયા છે.
સમર્પણ ગ્રુપ દ્વારા સ્થાપના કાળથી ચાલી આવતી ભવ્ય પરંપરાને જાળવી રાખીને આ વર્ષે પણ ગરબામાં પ્રવેશ માટે કોઈ પણ પ્રકારના પાસ રાખવામાં આવ્યા નથી, જેથી દરેક વર્ગના લોકો ઉત્સવમાં સહભાગી થઈ શકે. આ ઉપરાંત, રાત્રે ગરબા પૂર્ણ થયા બાદ મોડી રાત્રે મહિલાઓ અને દીકરીઓ હેમખેમ પોતાના ઘરે પહોંચી શકે તે માટે સંસ્થા દ્વારા સુરક્ષાના ભાગરૂપે ખાસ પાંચ વાહનોની નિઃશુલ્ક સુવિધા રાખવામાં આવી છે. આમ, મહેસાણામાં એક તરફ ખેલૈયાઓ પારંપરિક વસ્ત્રો અને ઉત્સાહ સાથે તાલ મિલાવવા આતુર છે, તો બીજી તરફ આયોજકોની ઉમદા વ્યવસ્થા અને પોલીસના સઘન બંદોબસ્તને પગલે સમગ્ર શહેર નવરાત્રિના રંગે રંગાવા માટે પૂર્ણપણે સજ્જ બન્યું છે.
