કેન્દ્ર સરકારની સ્વાયત્ત સંસ્થા ‘ન્યૂપા’ દ્વારા નવી દિલ્હી ખાતે રાષ્ટ્રીય કક્ષાએ બહુમાન કરાયું

શિક્ષણ ક્ષેત્રે મહેસાણાનો રાષ્ટ્રીય સ્તરે ડંકો: જિલ્લા પ્રાથમિક શિક્ષણાધિકારી ડૉ. શરદ ત્રિવેદીને પ્રતિષ્ઠિત ‘નેશનલ ઇનોવેશન એવોર્ડ’ એનાયત

ગરવી તાકાત ઃ 5-9-2026

શૈક્ષણિક વહીવટમાં ઉત્કૃષ્ટ સંશોધનાત્મક પ્રયોગો અને શ્રેષ્ઠ આયોજન બદલ ગૌરવપૂર્ણ સન્માન, સમગ્ર ગુજરાત અને શિક્ષણ જગતમાં ખુશીનો માહોલ

શિક્ષણ ક્ષેત્રે વિશિષ્ટ, પ્રેરણાદાયી અને નાવીન્યસભર પ્રયોગો દ્વારા ઉત્કૃષ્ટ કામગીરી કરનારા અધિકારીઓનું કેન્દ્ર સરકારના શિક્ષણ મંત્રાલય હેઠળની સ્વાયત્ત સંસ્થા નેશનલ ઇન્સ્ટિટ્યૂટ ઓફ એજ્યુકેશનલ પ્લાનિંગ એન્ડ એડમિનિસ્ટ્રેશન (ન્યૂપા), નવી દિલ્હી દ્વારા રાષ્ટ્રીય કક્ષાએ સર્વોચ્ચ સન્માન કરવામાં આવે છે. નવી દિલ્હી ખાતે આયોજિત ભવ્ય રાષ્ટ્રીય સમારોહમાં મહેસાણા જિલ્લા પ્રાથમિક શિક્ષણાધિકારી ડૉ. શરદ ત્રિવેદીને શિક્ષણ ક્ષેત્રે કરેલા અભૂતપૂર્વ સંશોધનાત્મક પ્રયોગો અને સર્વોત્તમ શૈક્ષણિક વહીવટી આયોજન બદલ પ્રતિષ્ઠિત ‘શૈક્ષણિક વહીવટમાં નાવીન્ય અને શ્રેષ્ઠ કાર્યપદ્ધતિઓ માટેનો રાષ્ટ્રીય પુરસ્કાર’ અર્થાત્ નેશનલ ઇનોવેશન એવોર્ડ અર્પણ કરી વિશેષ રૂપે સન્માનિત કરવામાં આવ્યા છે.

નવી રાષ્ટ્રીય શિક્ષણ નીતિ ૨૦૨૦ના અસરકારક અમલીકરણના ભાગરૂપે મહેસાણા જિલ્લાની તમામ સરકારી પ્રાથમિક શાળાઓમાં ધોરણ-૫માં અભ્યાસ કરતા ૨૩ હજારથી પણ વધુ બાળકો પોતાના ધોરણ અને સ્તર મુજબની તમામ શૈક્ષણિક ક્ષમતાઓ તેમજ અધ્યયન નિષ્પત્તિઓમાં સંપૂર્ણ પારંગત બને તે માટે વર્ષ ૨૦૨૪થી જિલ્લા પ્રાથમિક શિક્ષણાધિકારી ડૉ. શરદ ત્રિવેદીના કુશળ માર્ગદર્શન હેઠળ એક વિશેષ શૈક્ષણિક પ્રકલ્પ સતત કાર્યરત કરવામાં આવ્યો હતો. આ ભગીરથ કાર્યમાં જિલ્લાના તમામ તાલુકા પ્રાથમિક શિક્ષણાધિકારીઓ, તાલુકા સંસાધન કેન્દ્ર સંયોજકો (બી.આર.સી. કો-ઓર્ડિનેટર્સ), ક્લસ્ટર સંસાધન કેન્દ્ર સંયોજકો (સી.આર.સી. કો-ઓર્ડિનેટર્સ) તેમજ જિલ્લાની તમામ પ્રાથમિક શાળાઓના કર્મઠ શિક્ષકોના સઘન સહયોગથી વિદ્યાર્થીઓને ગણિત, ગુજરાતી, પર્યાવરણ, હિન્દી અને અંગ્રેજી જેવા પાયાના વિષયોમાં સંપૂર્ણ સક્ષમ બનાવવામાં આવ્યા હતા.

આ નવતર શૈક્ષણિક પહેલ અંતર્ગત જિલ્લાની વિષય નિષ્ણાત શૈક્ષણિક ટાસ્ક ફોર્સ દ્વારા અધ્યયન નિષ્પત્તિઓ પર આધારિત ‘ગુરુચાવી’ અને ‘ચાલો મગજ કસીએ’ જેવા અત્યંત ઉપયોગી શૈક્ષણિક સાહિત્યનું નિર્માણ કરવામાં આવ્યું હતું. વિદ્યાર્થીઓમાંથી સ્પર્ધાત્મક પરીક્ષાઓનો કાલ્પનિક ડર દૂર થાય તેવા ઉમદા હેતુથી શાળા અને જિલ્લા કક્ષાએથી ખાસ ‘અનુભવ કસોટીઓ’નું નિયમિત આયોજન કરી વિદ્યાર્થીઓને અદ્દલ રાજ્ય પરીક્ષા બોર્ડ જેવી જ વાસ્તવિક પરીક્ષાઓનો સતત મહાવરો પોતાની જ શાળામાં પૂરો પાડવામાં આવ્યો હતો. આ ઉપરાંત જવાહર નવોદય વિદ્યાલય પ્રવેશ પરીક્ષા, જ્ઞાન સેતુ ગુણવત્તા શિષ્યવૃત્તિ, પ્રાથમિક શિષ્યવૃત્તિ પરીક્ષા તેમજ રાષ્ટ્રીય અને રાજ્ય સ્તરની સિદ્ધિ સર્વેક્ષણ કસોટીઓ જેવી મહત્વપૂર્ણ સ્પર્ધાત્મક પરીક્ષાઓમાં મહેસાણા જિલ્લાના વિદ્યાર્થીઓનો દેખાવ સર્વોચ્ચ રહે તે માટે પદ્ધતિસરની તૈયારીઓ કરાવવામાં આવી હતી.

આ પ્રશંસનીય ઇનોવેશનના સુખદ પરિણામે મહેસાણા જિલ્લાના ૨૦ હજારથી વધુ તેજસ્વી વિદ્યાર્થીઓએ સંયુક્ત પ્રવેશ પરીક્ષા (કોમન એન્ટ્રેન્સ ટેસ્ટ)ની ગુણવત્તા યાદીમાં સ્થાન મેળવી નવો ઇતિહાસ રચ્યો છે, જ્યારે ૧૦ હજારથી વધુ વિદ્યાર્થીઓએ શિષ્યવૃત્તિ પરીક્ષામાં ભાગ લીધો હતો. સંયુક્ત પ્રવેશ પરીક્ષામાં જિલ્લાના વિક્રમજનક ૩૨૦૦થી વધુ વિદ્યાર્થીઓ મેરિટ યાદીમાં ઝળક્યા હતા. આ અવિરત અને સંનિષ્ઠ પ્રયાસોના પરિણામે ધોરણ-૫ના તમામ વિદ્યાર્થીઓની શૈક્ષણિક ગુણવત્તા તેમજ ‘ગુણોત્સવ ૨.૦’ના જિલ્લા સ્તરના પરિણામોમાં અભૂતપૂર્વ અને ગુણાત્મક સુધારો નોંધાયો છે. મહેસાણા જિલ્લા પ્રાથમિક શિક્ષણ પરિવારની આ પરિણામલક્ષી અને પ્રેરણારૂપ કામગીરીની રાષ્ટ્રીય સ્તરે નોંધ લેવાતા સમગ્ર ગુજરાતનું ગૌરવ વધ્યું છે, જેના પગલે ડૉ. શરદ ત્રિવેદીને મળેલા આ પ્રતિષ્ઠિત રાષ્ટ્રીય એવોર્ડ બદલ સમગ્ર શિક્ષણ જગત, સામાજિક અગ્રણીઓ અને વહીવટી તંત્ર તરફથી ચોમેર અભિનંદનની વર્ષા થઈ રહી છે.