કડીમાં આવેલ શરાફ બજારમાં ગતરોજ હસ્નૈન જ્વેલર્સમાં વહેલી સવારના સમયે તસ્કરો હાથ ફેરો કરી ગયા હતા. હસ્નૈન જ્વેલર્સ રાત્રિના સમયે બંધ હોવાના કારણે તસ્કરોએ આ મોકાનો ફાયદો ઉઠાવી વહેલી સવારેજેવલર્સની દુકાનનું લોક તોડીને ચોરીને અંજામ આપવામાં સફળ બન્યા હતા. હસ્નૈન જ્વેલર્સ દુકાન માંથી કુલ 2.700 કિલો ચાંદી આશરે રોકડ રકમ સહિત 1,95,000 લાખથી વધુ કિંમતનો મુદામાલ લઈ ફરાર થઈ ગયા હતા. દુકાનમાં લગાવેલ સી.સી. ટીવી કેમેરામાં પકડાઈ ના જવાય તેમાટે સી.સી.ટીવી કેમેરાનું ડિવીઆર પણ ચોરી કરીને નાસી ભાગ્યા હતા. આ બાબતની જાણ દુકાનના માલિકને સવારે થતા દુકાનની અંદર રહેલ સામાન અસ્ત વ્યસ્ત હાલતમાં પડેલ જોવા મળતા ચોરી થઈ હોવાનો અંદાજ લગાવતા તાત્કાલિક ધોરણે પોલીસને જાણ કરી હતી. જેથી પોલીસ આ કેસની તપાસ હાથ ધરી છે.
આ સીવાય ગાંધી ચોક પોલીસ સ્ટેશનના 25 થી 30 મીટરના અંતરમાં આવેલ શક્તિ કો.ઓ ક્રેડિટ સોસાયટીમાં પણ વહેલી સવારનો ફાયદો ઉઠાવીને તસ્કરો દ્વારા ચોરી કરવાનો પ્રયાસ કરાયો હતો. જેમાં આ બેંકના બહારના ભાગમાં આવેલ સટર તોડીને અંદર જવાનો પ્રયાસ કરવામાં આવ્યો હતો અંદરની બાજુમાં લોખંડની બીજી જાળી લગાવેલ હતી તેને પણ તોડવાનો પ્રયાસ કરવામાં આવ્યો હતો પરંતુ તસ્કરો અંદરની લોખંડની જાળીને તોડવામાં નિષ્ફળ રહેતા આ બેંકમાંથી ચોરી કર્યા વગર પરત ફર્યા હતા.
કડીમાં ઘણા સમયથી રાત્રિના સમયે તસ્કરો અલગ અલગ જગ્યાનો ટાર્ગેટ બનાવી સહેલાથી ચોરીને અંજામ આપી રહ્યા છે. કડી પોલીસ નાઇટ પેટ્રોલીંગ દરમ્યાન માત્ર વાહનના ડીઝલના ધુમાડા ઉડાવી રહ્યા હોય તેવુ જણાઈ રહ્યુ છે. સતત કડી પોલિસને આ તસ્કરો ઘણી વાર એક પછી એક ચોરી કરી ને ચેલેન્જ આપી રહ્યા હોવા છતાં હજુ સુધી કડી પોલિસ આવા તસ્કરો ને પકડવા માં નિસ્ફળ સાબિત થઈ છે. શું કડીમાં વધી રહેલા ચોરીના બનાવોને કડી પોલીસ અંકુશમાં લાવી શકશે ? કડીની પોલીસ જાહેર માર્ગો પર નાઈટ પેટ્રોલીંગમાં જોવા તો મળે છે પરંતુ શહેરના અંદરના વિસ્તારોમાં પેટ્રોલીંગમાં કરે છે કે કેમ ? તેને શહેરીજનોમાં પ્રશ્નો ઉઠી રહ્યા છે. જેથી શહેરમાં અનેક ચોરીના બનાવો સામે આવતા પોલીસ પેટ્રોલીંગ ઉપર સવાલ ઉઠી રહ્યા છે કે, પોલીસ દ્વારા માત્ર જાહેર માર્ગો પર પેટ્રોલીંગ કરી ડીઝલના ધુમાડા કરવામાં આવી રહ્યા છે પરંતુ અંદરના વિસ્તારમાં કોઈ જ પ્રકારનુ નાઈટ પેટ્રોલીંગ કરવામાં આવતુ નથી જેથી તસ્કરોને મોકળાશ મળી છે.
