વરરાજાએ વરઘોડામાં ફાયરીંગ કરતા પોલીસે કરી અટકાયત, એરગન કબ્જે કરાઈ

શેર કરવા અહીં ક્લિક કરો.
કાણોદરમાં લગ્નમાં હવામાં ફાયરીંગ અને સોશીયલ ડિસ્ટન્સના ભંગ બદલ વરરાજા સહિત ત્રણની અટકાયત
 

જાહેરમાં એરગનથી ફાયરિંગ કરનાર વરરાજાનો વીડિયો સોશિયલ મીડિયામાં વાયરલ થયો  હતો

પાલનપુર તાલુકાના કાણોદર ગામે એક લગ્નપ્રસંગમાં જાહેરમાં ઘોડા પર બેસી હવામાં ફાયરિંગ કરતો વીડિયો વાયરલ થયો હતો. જે અંગે મીડિયામાં અહેવાલો પ્રસિદ્ધ થયાં હતાં. જેમાં કોરોના વાયરસની મહામારીને લઈ માસ્ક તથા સોશીયલ ડીસ્ટન્સનો પણ ભંગ થયો હોવાનું જણાયું હતુ. આથી પોલીસે વિડીયોની તપાસ કરી ફાયરીંગ કરનાર વરરાજા સહિત ત્રણ લોકોની અટકાયત કરી એરગન પણ કબ્જે લીધી હતી. 
 
 

બનાસકાંઠા જિલ્લા સહિત રાજ્યભરમાં હાલમાં કોરોના મહામારીની પગલે સરકારની ગાઈડલાઈન અનુસાર લગ્ન પ્રસંગોમાં તેમજ અન્ય પ્રોગ્રામોમાં પણ સોશીયલ ડિસ્ટન્સ અને માસ્ક સહિતના નિયમોનું ચુસ્તપણે પાલન કરવા માટે જણાવવામાં આવેલુ છે. પરંતુ ગ્રામ્ય વિસ્તારોમાં મોટાભાગના લગ્ન પ્રસંગોમાં નિયમોના ધજાગરા ઉડતા હોય છે. જેમાં પાલનપુર તાલુકાના કાણોદર ગામે પણ લગ્નના વરઘોડામાં જાહેરમાં એરગનથી ફાયરિંગ કરવા તેમજ સોશિયલ ડિસ્ટન્સનો પણ ભંગ કરવા મામલે પાલનપુર તાલુકા પોલીસે ત્રણની અટકાયત કરી હતી. કાણોદર ગામે લગ્નપ્રસંગમાં એરગનથી જાહેરમાં હવામાં ફાયરિંગ કરવા બાબતનો વીડિયો સોશિયલ મીડિયામાં ખૂબ જ વાયરલ થયો હતો. જે બાબતે મીડિયામાં પણ અહેવાલો પ્રસિદ્ધ કરાતા પાલનપુર તાલુકા પી.એસ.આઇ બી.આર.પટેલ તથા તેમની ટીમે આ બાબતે સઘન તપાસ આદરી હતી. જેમાં વીડિયોની તપાસમાં હવામાં ફાયરીંગ કરનાર વરરાજા આશિષકુમાર દેવરાજ ચાવડા રહે. કાણોદર તથા મદદગારીમાં પિયુષકુમાર લવજીભાઈ ચાવડા રહે. કાણોદર તેમજ સાગરભાઈ કરસનભાઇ રણાવાસીયા રહે. મોટા કરઝા, તા. અમીરગઢ વાળા જણાઈ આવતા ત્રણેયની અટકાયત કરી પૂછપરછ હાથ ધરી એરગન કબ્જે કરવામાં આવી હતી. લગ્નના વરઘોડામાં નિયત કરેલ સંખ્યા કરતાં વધુ લોકો એકત્ર થઇ તેમજ માસ્ક પણ ન પહેરી કોરોબા વાયરસની મહામારીના જાહેરનામાનો ભંગ થયેલ હોવાનું જણાતાં તે બાબતે જાહેરનામાના ભંગ બદલ કાયદેસરની કાર્યવાહી હાથ ધરવામાં આવી છે.

શેર કરવા અહીં ક્લિક કરો.

You cannot copy content from this website.