ગરવી તાકાત ઃ 25-8-2026
મહેસાણા જિલ્લામાં ગેરકાયદેસર હથિયારોની હેરાફેરી અને અસામાજિક પ્રવૃત્તિઓ અટકાવવા માટે પોલીસ તંત્ર દ્વારા સઘન પેટ્રોલિંગ અને તપાસ અભિયાન ચલાવવામાં આવી રહ્યું છે. આ દરમિયાન મહેસાણા એસઓજી (સ્પેશિયલ ઓપરેશન ગ્રુપ) ની ટીમના હેડ કોન્સ્ટેબલ હેમેન્દ્રસિંહ તથા પોલીસ કોન્સ્ટેબલ મનુભાને ચોક્કસ બાતમી મળી હતી કે, અલોડા ગામનો એક શખ્સ ગેરકાયદેસર અગ્નિશસ્ત્ર સાથે છઠિયારડાથી અલોડા તરફ જવાના રસ્તા પર આવેલા રૂપેણ મુક્તિધામના ગેટ પાસે શંકાસ્પદ હાલતમાં ઊભો છે.
આ મળેલી ચોક્કસ બાતમીના આધારે એસઓજી પોલીસે તાત્કાલિક પંચોને સાથે રાખીને નિર્ધારિત સ્થળે ઓચિંતો દરોડો પાડ્યો હતો. પોલીસ ટીમે ઘટનાસ્થળે ઘેરાબંધી કરીને શંકાસ્પદ યુવકને ઝડપી લીધો હતો. તેની અંગઝડતી લેતાં તેની પાસેથી કોઈપણ પ્રકારના અધિકૃત લાયસન્સ કે પાસ-પરમિટ વગરની રૂ. ૨૫,૦૦૦ ની કિંમતની એક દેશી પિસ્તોલ મળી આવી હતી. પોલીસે આ ગેરકાયદેસર હથિયારનો મુદ્દામાલ તાત્કાલિક જપ્ત કર્યો હતો.
ઝડપાયેલા આરોપીની પૂછપરછ કરતાં તેની ઓળખ ૨૬ વર્ષીય શક્તિસિંહ રમણજી કુરવજી ઠાકોર (રહેવાસી અલોડા મોટો ઠાકોરવાસ, તાલુકો અને જિલ્લો મહેસાણા) તરીકે થઈ છે. પોલીસે આરોપી વિરુદ્ધ મહેસાણા તાલુકા પોલીસ સ્ટેશનમાં આર્મ્સ એક્ટ હેઠળ ગુનો નોંધી તેની અટકાયત કરી છે. આ શખ્સ આ ગેરકાયદેસર પિસ્તોલ ક્યાંથી લાવ્યો હતો, કોની પાસેથી ખરીદી હતી અને કયા ઈરાદાથી સાથે રાખીને ફરતો હતો તે દિશામાં પોલીસે આગળની ઊંડાણપૂર્વકની તપાસ શરૂ કરી છે.
