સભા સંબોધ્યા બાદ હીરાનગર ચોકથી ફરી રામજીભાઈ ઠાકોર ટ્રેકટર ચલાવી મહેસાણા કલેકટર કચેરી સુધી પોતાના કાર્યકરો સાથે રેલી સ્વરૂપે પહોંચ્યા હતા. જ્યાં ટ્રેક્ટર આવતા જ હાજર પોલીસ કર્મીઓએ મુખ્ય દરવાજો બંધ કરી દીધો હતો. કોંગ્રેસ કાર્યકરોની ઈચ્છા હતી કે રામજીભાઈ ઠાકોર ટ્રેક્ટર સાથે કલેકટર કચેરી કેમ્પસમાં પ્રવેશ કરે જેથી રામજીભાઈ ઠાકોરે પોતાના કાર્યકરો સાથે ટ્રેકટર હંકારી કલેક્ટર કચેરી કેમ્પસમાં પહોંચ્યા હતા. રામજીભાઈ ઠાકોરે કલેક્ટર સમક્ષ પોતાનું ઉમેદવારી ફોર્મ ભર્યું હતું. જેની ડિપોઝીટ નગરપાલિકાના પૂર્વ પ્રમુખ ઘનશ્યામ સોલંકી અને પાલિકાના વિપક્ષ નેતા કમલેશ સુતરિયાએ 25 હજાર રૂપિયા ભરી સહકાર આપ્યો હતો.
રામજીભાઈ ઠાકોરે જણાવ્યું કે, સમગ્ર મહેસાણાની જનતા મારી સાથે છે. વિજયના આશીર્વાદ સાથે આજે ફોર્મ ભરવા આવ્યો છું. હું પોતે ખેડૂત છું અને ખેડૂતનો અવાજ બનવા માટે ટ્રેક્ટર લઈને આવ્યો છું. મહેસાણામાં આ વખતે રેકોર્ડ બ્રેક થવાનો છે. 1 લાખથી વધુ મતોથી જીત થશે. વર્ષોથી સમાજ સાથે જોડાયો છું સમાજ મને જીતાડશે. લોકો સ્વંયભુ ફંડ ઉઘરાવે છે. લોકોને ખ્યાલ છે રામજી ઠાકોર એક સામાન્ય પરિવાર માંથી આવે છે અને રામજી ઠાકોરને જીતાડવા સ્વયંભુ ફંડ લોકો ઉઘરાવે છે. અત્યાર સુધીમાં કેટલું ફંડ મળ્યું એ ખ્યાલ નથી પણ ચોક્કસ આંકડો આવશે ત્યારે જાણ કરીશું.
