દિયોદર ખાતે મુખ્યમંત્રીશ્રી ભૂપેન્દ્રભાઈ પટેલના અધ્યક્ષસ્થાને પૂજ્ય સંત શ્રી સદારામ બાપુની ૧૧૫ મી જન્મ જયંતિની ઉજવણી કરાઇ

ગરવી તાકાત કાંકરેજ : બનાસકાંઠા જિલ્લાના દિયોદર ખાતે મુખ્યમંત્રીશ્રી ભૂપેન્દ્રભાઈ પટેલના અધ્યક્ષસ્થાને પૂજ્ય સંતશ્રી સદારામ બાપુની ૧૧૫ મી જન્મ જયંતિની ઉજવણી કરવામાં આવી હતી. આ પ્રસંગે મુખ્યમંત્રીશ્રીએ જણાવ્યું કે, પૂજ્ય સંત શ્રી સદારામ બાપુએ શિક્ષણ, વ્યસનમુક્તિ અને હિંસાના નિવારણ માટેના અનેક સેવાકીય કાર્યો કર્યા છે. પૂજ્ય સંત શ્રી સદારામ બાપુએ તેમના ભજન સતસંગ થકી લાખો લોકોને વ્યસન મુક્ત બનાવ્યા છે.

બાપુનું સાદું જીવન એજ તેમનો જીવન સંદેશ હતો, તેમણે કહ્યું કે લોકોની મુશ્કેલીઓ અને પીડાઓ દૂર કરતાં કરતાં સાદું જીવન જીવી તેઓ આ ભવસાગર તરી ગયા છે. તેમણે કહ્યું કે વ્યસનો વ્યક્તિ અને કુટુંબને બરબાદ કરી દેતાં હોય છે એ વાત સારી રીતે સમજીને તેમણે કોઈ એક જ્ઞાતિ માટે નહીં પરંતુ સર્વ સમાજના વિકાસ માટે પૂજ્ય બાપુએ કામ કર્યું છે ત્યારે આવા સંતોના જીવનમાંથી પ્રેરણા મળવી વેરઝેર ભૂલીને જીવનમાં આગળ વધીએ. છોડમાં રણછોડની જેમ વ્યક્તિમાં પણ રણછોડના દર્શન કરી સમાજના વિકાસ માટેના કાર્યો કરવા તેમણે અનુરોધ કર્યો હતો.

શિક્ષણ રાજ્ય મંત્રીશ્રી કિર્તીસિંહ વાઘેલાએ જણાવ્યું કે, પૂજ્ય સંતશ્રી સદારામ બાપા ભલે આજે આપણા વચ્ચે નથી પરંતુ તેમનો ઉપદેશ અને આશિર્વાદ હંમેશા આપણી સાથે છે. સમગ્ર ઉત્તર ગુજરાતમાં બાપાએ ભજન અને ભક્તિની સાથે સાથે સમાજ સુધારણાનો વિરાટ કાર્ય કર્યું છે. જીવનકાળ ના સાત દાયકાથી પણ વધુ વર્ષો શિક્ષણના અભાવથી સમાજમાં વ્યાપી ગયેલી વ્યસનની બધીને દૂર કરવા ખપાવી દીધા.