જીલ્લામાં પોલીસ તંત્રને ખુલ્લો પડકાર આપી ખાનગી સટલિયાઓ બેફામ કે પછી હપ્તા વસૂલી
ગરવી તાકાત, સાબરકાંઠા તા. 21 – ચિરાગ મેઘા – દિવાળી તહેવાર જેમ નજીક આવી રહ્યો છે તેને લઈ શ્રમિકો તેમજ પ્રજાજનો તહેવારની ઉજવણી માટે પોતાના માદરે વતન તરફ પરત ફરી રહ્યા છે. ત્યારે તહેવાર ટાણે સાબરકાંઠા જિલ્લાના માર્ગો પર ખાનગી સટલિયાઓ બેફામ રીતે પોલીસ તંત્રને ખુલ્લો પડકાર આપી મુસાફરોને મોતની સવારી કરાવતા નજરે પડી રહ્યા છે.
ખાસ કરીને સાબરકાંઠા જિલ્લાના હિંમતનગર ઇડર, ઈડર ખેડબ્રહ્મા, ખેડબ્રહ્મા પોશીના, તેમજ ભિલોડા તરફના માર્ગો ઉપર દિવસ રાત દોડતા ખાનગી સટલિયાના ચાલકો થોડાંક વઘુ પૈસા કમાણી કરવાની લાયમાં મુસાફરોને ગાડીના બોનેટ તેમજ ગાડીની છત ઉપર જીવના જોખમે મુસાફરોને મુસાફરી કરાવી રહ્યા છે. સામાન્ય રીતે પોલીસ તંત્ર તેમજ ટ્રાફિક પોલીસ દ્વારા નિયમોના પાલનને હાઇવે રોડ પર અનેક સ્થળે ચુસ્તપણે કામગીરી કરવામાં આવતી હોય છે.
જોકે પોલીસ તંત્રને ખુલ્લો પડકાર આપી રહેલ સટલિયા ચાલકો સામે તંત્ર દ્વારા કોઈપણ પ્રકારની કાર્યવાહી ન કરવામાં આવતા પોલીસ તંત્ર સામે વિવિઘ પ્રશ્નો ઉદભવી રહ્યા છે. ત્યારે કાયદાનું ભાન કરાવનાર તંત્ર કુંભકરણની નિંદ્રામાં સૂતું હોય તે પ્રમાણે તહેવાર ટાણે મુસાફરો મોતની સવારી કરવા મજબૂર બન્યા છે. જોકે સુરક્ષા અને સલામતીની વાતો કરતી પોલીસ તંત્ર પણ ખાનગી સટલીયાઓ સામે કાર્યવાહી ક્યારે કરશે તે જોવું રહ્યું જો કે હાલના સમય મુસાફરો મોતની સવારી કરી પોતાના જીવ જોખમમાં મૂકી રહ્યા છે…