પાટનગરમાં પોલીસની આબરૂના લીરેલીરા ઉડ્યા, દારૂના નશામાં ખાખીએ રેલીંગ તોડી જીપને 100 ફૂટ હંકારી

શેર કરવા અહીં ક્લિક કરો.

રાજ્યના પાટનગર ગાંધીનગરમાં ગઈકાલે રાત્રે દારૂ બંધીનાં લીરેલીરા ખાખી વરદીએ ઉડાવ્યા હતા. ડ્રાઈવરે સરકારી ગાડી બેફિકરાઈથી હંકારી પથીકાશ્રમ સર્કલ નજીક રેલીંગ તોડી નાખી 100 ફૂટ અંદર સર્વિસ રોડ પર ગાડી ઘુસાડી દીધી હતી. આ ઘટનાના પગલે ભયનો માહોલ ફેલાયો હતો. જોકે, પ્રત્યક્ષ દર્શીઓ મુજબ ખાખીની આડમાં ડ્રાઇવર ચિક્કાર દારૃ પીને સરકારી જીપ ચલાવતો હતો જેની ગાડીમાં દારૂની બોટલો પણ હતી.

પથીકાશ્રમ સર્કલ નજીક જીપ રેલીંગ સાથે અથડાઇ: ગાંધીનગરમાં દારૂની પ્રવૃતિ ફૂલીફાલી હોવાનો તાજો દાખલો ગઈકાલે રાત્રે ખાખી વરદી ડ્રાઇવરે આપી દીધો હતો. પથીકાશ્રમ સર્કલ નજીક સરકારી જીપના ચાલકે પોતાની જીપ ગફલતભરી અને બેફિકરાઈથી હંકારી જીપને રોડની રેલીંગ સાથે અથડાવી દીધી હતી. તેમ છતાં ભાન ભૂલેલા ખાખીધારીએ બ્રેક મારવાની જગ્યાએ જીપને રોડની સાઈડમાં 100 ફૂટ સુધી સર્વિસ રોડ સુધી હંકારી રાખી હતી. જેનાં કારણે રોડ પર ભયનો માહોલ છવાઈ ગયો હતો.

જીપ ચલાવનાર ડ્રાઇવર ચિક્કાર દારૃના નશામાં હતો: આ અકસ્માત થતાં મોટી સંખ્યામાં ભીડ એકઠી થઈ ગઈ હતી. ત્યારે માલુમ પડયું હતું કે, જીપ ચલાવનાર ડ્રાઇવર ચિક્કાર દારૃના નશામાં હતો. એકઠી થયેલી ભીડને જીપમાં દારૂની બોટલો પણ જોવા મળી હતી. આ દરમિયાન જ થોડીક મિનિટોમાં બે બાઇક સવાર આવી પહોંચ્યા હતા. જેમાંથી એ ઈસમે જીપમાંથી દારૂની બોટલો કાઢી લઈને ત્યાંથી રવાના થઇ ગયો હતો. બનાવમાં પગલે ટ્રાફિક જામનાં દ્રશ્યો પણ સર્જાયા હતા. ત્યારે સ્થાનિક પોલીસ પણ સ્થળ પર દોડી આવી હતી, પરંતુ બાઈક સવાર બે ઈસમો પૈકી એક જણ ઈજાગ્રસ્ત ડ્રાઇવરને રિક્ષામાં સારવાર અર્થે લઈ ગયો હતો. બાદમાં પોલીસે ટ્રાફિક ક્લિયર કરાવ્યો હતો. બીજી તરફ રાત્રે સ્થળ પર હાજર પ્રત્યક્ષ દર્શીએ કહ્યું હતું કે, ડ્રાઇવર દારૂનાં નશામાં હતો. જેણે રેલીંગ તોડીને સરકારી સંપતિને નુકશાન કરી લોકોના જીવ જોખમમાં મૂકી દીધા હતા. જેની જીપમાં દારૂની બોટલો પણ હતી અને જીપને પણ નુકશાન થયું હતું.

પીઆઈએ નશાની વાત નકારી: આ અંગે સેકટર-7 પીઆઈ મયુરધ્વજસિંહ જાડેજાએ જણાવ્યું હતું કે, એસઆરપીનો ડ્રાઈવર સરકારી ગાડી લઈને નિકળ્યો હતો. જેની આંખો અંજાઈ જવાથી ઘટના ઘટી હતી. જોકે, તે જીપમાં દારૂની બોટલો ન હતી. તેમજ ડ્રાઈવર પણ પીધેલ ન હતો. જો તે દારૂનાં નશામાં હોત તો કાયદેસરની કાર્યવાહી હાથ ધરવામાં આવી હોત.

શેર કરવા અહીં ક્લિક કરો.

You cannot copy content from this website.