૩ઃ વિશિષ્ટ ભૌગોલિક પરિસ્થિતિ ધરાવતા ડાંગ જિલ્લામાં ચાલુ વર્ષે ઉનાળા દરમિયાન પીવાના પાણીન સમસ્યા ન સર્જાય તે માટે સંબંધિત વિભાગોને પરસ્પર સંકલન, અને સહયોગ સાથે યુદ્ધના ધોરણે પાણીના પ્રશ્નોનું નિરાકરણ લાવવાની સૂચના, ડાંગ જિલ્લાના પ્રભારી મંત્રી શ્રી રમણલાલ પાટકરે આપી હતી.રાજ્યમાં પ્રવર્તતી પાણી સહિત અછતની પરિસ્થિતિને ધ્યાને લેતા પ્રજાજનોને ભરઉનાળે પાણીની મુશ્કેલીનો સામનો ન કરવો પડે તે માટે યુદ્ધના ધોરણે, સમસ્યાનો હલ શોધવા બાબતે માર્ગદર્શન આપતા શ્રી પાટકરે જિલ્લામાં બોર/હેન્ડપંપ મરામતના કામો માટે પાણી પુરવઠા યાંત્રિક વિભાગને જરૂર પડયે મેન પાવર અને મશીનરી વધારીને પણ આવા કામો સત્વરે પૂર્ણ કરવાની સૂચના આપી હતી. જિલ્લામાં જરૂર પડયે ટેન્કરથી પણ પાણી પુરૂ પાડીને પ્રજાકિય હાલાંકી દૂર કરવાની હિમાયત કરતા પ્રભારી મંત્રીશ્રીએ ચાલુ વર્ષે પૂરક સુવિધા સાથે લાંબા ગાળાના કાયમી આયોજન ઉપર પણ ભાર મુકવાનો અનુરોધ કર્યો હતો.ડાંગ કલેક્ટોરેટ ખાતે યોજાયેલી એક તાકિદની બેઠકને સંબોધતા પ્રભારી મંત્રી શ્રી રમણલાલ પાટકરે પ્રજાની પાણીની જરૂરિયાતને પહોંચી વળવા માટે સમગ્ર પ્રશાસનિક અધિકારીઓને પરસ્પર સંકલન અને સહયોગ સાથે કામગીરી પાર પાડવાનો અનુરોધ કર્યો હતો. બેઠકમાં જિલ્લા કલેક્ટર શ્રી એન.કે.ડામોરે પ્રભારી મંત્રીશ્રીને જિલ્લાના પ્રજાજનો તરફથી મળેલી રજુઆતોના નિકાલ બાબતે સંબંધિત અધિકારીઓને માર્ગદર્શન પુરુ પાડતા, સત્વરે સમસ્યાના નિરાકરણની દિશામાં કાર્યવાહી હાથ ધરવાની સૂચના આપી હતી.  જિલ્લા વિકાસ અધિકારી શ્રી એચ.કે.વઢવાણિયાએ જિલ્લા વહિવટી તંત્ર વતી પ્રભારી મંત્રીશ્રીને જિલ્લાની પાણીની સમસ્યાનું સૌના સહિયારા પ્રયાસોથી નિરાકરણ લાવવાની ખાતરી આપી હતી.

બીજા સાથે સમાચાર શેર કરો.