ન્યૂઝીલેન્ડમાં ચિંતાજનક રીતે વધી રહેલી માઈક્રોપ્લાઝ્મા બોવિસ નામની બીમારીને અટકાવવા માટે સરકારે ૧.૨૬ લાખ ગાયોને મારવાનો આદેશ આપ્યો છે. દેશભરમાં ફેલાતી બીમારીને કાબુમાં લેવા માટે આ આકરો નિર્ણય લેવાયાની સરકારે જાહેરાત કરી હતી. ન્યૂઝીલેન્ડના વડાપ્રધાન જેસિંન્ડા આર્ડેને એક નિવેદનમાં જણાવ્યું હતું કે આ નિર્ણય અમારા માટે બહુ મુશ્કેલ હતો. અબોલ જીવોનો નાશ કરવાનો નિર્ણય ન છૂટકે લેવો પડયો છે. કારણ કે અમારી પાસે બે જ વિકલ્પો હતો – એક તો બીમારીને અટકાવવા માટે જેમાં સંક્રમણ ફેલાયું હતું તે ગાયોનો નાશ કરવો અથવા તો આખા દેશમાં એ બીમારી ફેલાવવા દેવી. આખરે અમે ૧.૨૬ લાખ ગાયોનો નાશ કરવાનો નિર્ણય લીધો છે. બોવિસ નામની આ બીમારીના કારણે વિચિત્ર પ્રકારનો તાવ આવે છે, ગાંઠ થાય છે અને સાંધા જકડાઈ જવાની બીમારી શરીરમાં જોવા મળે છે. સરકારે દાવો કર્યો હતો કે આ બીમારીથી લડવા માટે અત્યાર સુધીમાં ૪૧૫૦ કરોડ રૃપિયાનો ખર્ચ થઈ ચૂક્યો છે. ગાયોના નાશ કરવાથી કૃષિ આધારિત અર્થતંત્રને ભારે નુકસાન થશે, પણ એ આકરા નિર્ણય વગર બીજો વિકલ્પ ન હતો એવું કહીને વડાપ્રધાને કહ્યું હતું કે ન્યૂઝીલેન્ડમાં ૧ કરોડ કરતા વધુ ગાયો છે અને ડેરી ઉદ્યોગ ન્યૂઝીલેન્ડમાં બહુ જ મોટાપાયે છે. આટલી ગાયોનો નાશ થશે એટલે ન્યૂઝીલેન્ડને કરોડોનું નુકસાન થશે એમ પણ સરકારી નિવેદનમાં કહેવાયું હતું. ઉલ્લેખનીય છે કે થોડા મહિના પહેલાં આ બીમારીને અટકાવવા માટે ન્યૂઝીલેન્ડમાં ૨૪,૦૦૦ ગાયોનો નાશ કરાયો હતો. આ મવેશિયો ગાયોમાં ફેલાયેલી બીમારીની લપેટમાં અન્ય પશુઓ પણ આવ્યા છે. દુનિયાના કુલ દૂધ ઉત્પાદનમાંથી ૩ ટકા ઉત્પાદન એકલા ન્યૂઝીલેન્ડમાં થાય છે.